這裡曾經是我和Tony一同生活的好地方。

我和Tony由知己變成情人，”文字”一直扮演很重要的角色。我們的相識由在ICQ徹夜談心開始。後來某日我突然話想出版刊物，傻仔Tony哥哥又肯比我老點，同我一齊係中大團契搞文字事工，幫我實現左我既夢想。哈哈，雖然記憶中果年帶組好勞氣，而且我勇字行頭，有頭威無尾陣既性格，搞到Tony哥哥好多野都要包底，差d做死佢！不過雖然好辛苦，但就係我地係個forum度你一言我一語，恩威並重咁帶討論、寫文章，”教化”團契師弟師妹；又在”曬命報”(宜家諗返個名真係好leung)嘔出一篇一篇文章，兼用神奇魔法美化文字事工既衰仔衰女既文(專業名詞叫”編輯”)，我同tony既默契感情就咁越黎越深，yeah yeah~  呢個blog既”雙思集“就係收輯呢個時期我地出版/在網上forum post過的文章。

(咦，點解阿引言咁長既!) 咁我地搞文字事工上左條係網上寫野既隱，果時Tony又突然鍾意左影相，就係咁，我地就決定要整呢個網頁，繼續旁若無人好有默契咁寫野(朝思)，兼比tony發表佢既得意照片(慕相)！當年已經開始流行寫blog，但好似我地咁兩個人一齊寫一個blog，就無乜lu，所以我當時寫既第一篇post，係度講笑話我地終於有一個家，搞到有人以為我地可以同居/結婚(tony還把我想留下的、以前n個blog加起來的舊文放在這裡，所以感覺真係好似由娘家執野搬屋，然後一齊同居生活！)

兩個人一齊寫BLOG同一個人寫有乜唔同？就係會互相撞擊，擦出新火花囉！我覺得好好玩嫁，亦預計阿讀者你會覺得幾特意。例如上文講過呢個BLOG既第一篇文正式新居入伙，我寫完之後，TONY好快就寫左新居與 Web 2.0，內容與我的文章互相呼應，又提出一些另外的獨特新見解。說真的，我真的很懷念過去與TONY在文字世界如此互動的美好時光。只是，隨著我和他的生活場景有所不同，我們的生活節奏再不像求學時期那樣接近。而且當如今變成了老夫老妻，缺乏了生活的距離，又對彼此都太熟悉，當初那熾熱的火花已不再了，我們的相處已進入了另一個階段。青春歲月，總是浪漫又令人難以忘懷。

至於呢個blog既名：life.happensto.be(生活‧偶然‧如此)，其實亦表達了我們共同的生活信念。生活中許多事都是偶然的，有時驚喜，有時荒謬，有時跟你開玩笑，有時XX……(請自行補充)，不過這些都值得我們去朝思暮想，好好體味感受，並留下一些文字/視覺的生活記憶。

所以我說，這裡曾經是我和Tony一同生活的好地方。

不過，如果你竟然有時還會看這個BLOG，你會發現如上文所言，我和TONY的POST已沒什麼默契可言。之前我教書忙碌時，幾近停止生產。現在嘛？到我空閒一點，又再勁出POST，TONY就無呢個空間lu。另外，其實睇開呢個blog既friends應該都係我班facebook friends。當facebook越來越凝聚到我班朋友仔，為左市場需要，似乎post文同相去facebook，會熱鬧一d，而大家亦好似會expect我有乜野講會post上facebook，唔會黎呢度lu，嘿嘿。我開始懷疑呢個blog既存在價值啦~~其實我一直都想執個blog的categories同d好outdated既朋友blog的連結，但由於我一直都覺得根本無人睇呢個blog，一直我都得過且過，懶得執。

究竟繼唔繼續呢個對我同tony咁有意義既網頁好呢？如果繼續下去，這裡同facebook的不同是什麼呢？哈哈，其實我懷疑我由始至終是在自言自語。讓這個blog荒廢好久，是我們的錯，但究竟應唔應該回頭是岸，還是一走了之？