琴日精神上好攰好攰，攰到好想死，唔係講笑果種想死，係真係覺得無乜求生意志。我係度想像我最想見既人出現係我面前，但我都係無興趣見佢，我就知道我真係攰到癲左。又一次覺得，寧願徹底係人群中永遠消失。岩岩去美國，經常摺埋唔想見人，就係因為呢種攰到想死既感覺揮之不去。

今次回港我好難得咁好有系統咁安排時間表。頭先再翻睇過去10日既時間表，我係果d會令我情緒波動既約會旁邊寫個攰字，我發現我寫左7個攰，另外仲有3單空氣傳波既累人事件，即係加埋一共有10個攰。唉，唔怪得琴日會攰成咁啦。不過呢，我又發現10個攰入面，有7個攰我會用值得去形容，簡單黎講，即係果7個攰係有意義既攰。不過其實咪就係有太多有意義既野密集式咁發生，所以吃不消囉，唉……反而有一樣野，我唔知我應唔應該怪自己。我一直都覺架啦，今次回港有好多突發既野，咁我就又係d攰既約會/事件搵出d突發野出黎，嘩，竟然10個攰有6個係突發架！不過咁樣諗諗下又覺得唔對路，其實邊有咁Q多突發事件，好明顯係我既預報系統出左D事。最後我既結論係，6個突發入面，有4個係主觀地以為係突發(潛台詞即係好唔突發，唔知點解會預計唔到)，有1個就真係好客觀係突發，有1個就界乎係預計內同預計外之間啦。

寫到呢度，我覺得自己好勁，竟然會寫左篇咁既野，我痴得好徹底呀……但我鍾意，吹咩？呢篇文無聊得好有意義，你唔覺咩？